អ៊ីតាលី៖ អ្នកចាត់ការ AS Roma លោក Jose Mourinho ជាថ្មីម្តងទៀតបានទទួលកាតក្រហមបណ្តេញចេញពីទីលាន ក្នុងជំនួបនៅកីឡដ្ឋាន Stadio Olimpico ដែលក្រុមចចកអ៊ីតាលីនេះចែកគ្នាម្នាក់ ១ពិន្ទុ និងបញ្ចប់ការឈ្នះ ៨ប្រកួតតាំងពីបើករដូវកាលថ្មីរបស់ Napoli។

យប់មិញនេះ ក្រុមភ្ញៀវ Napoli មានឱកាស និងស្ថិតិគ្រប់គ្រងបាល់ល្អជាង Roma ជាពិសេសឱកាសរបស់ Victor Osimhen ប៉ុន្តែត្រូវខកខានដោយបង្គោលទី។ Tammy Abraham ក៏បានបង្កើ​តឱកាសសម្រាប់ Roma ផងដែរ ប៉ុន្តែក្រុមទាំងពីរសុទ្ធតែគ្មានសំណាងរកគ្រាប់បាល់បានដូចគ្នា។ បុរសសញ្ជាតិព័រទុយហ្គាល់ JM បានទទួលការបណ្តេញចេញពីលោកអាជ្ញាកណ្តាល ក្រោយមានការតវ៉ាខ្លាំងលើការសំរេចចិត្តលើទីលាន។ 

យ៉ាងណាក្តី ១ពិន្ទុនៅផ្ទះរបស់ Roma នេះ ក៏ល្មមគ្រប់គ្រាន់សំរាប់ Napoli ក្នុងការបន្តឈរនៅកំពូលតារាងផងដែរ ដោយមាន ២៥ពិន្ទុ ឈ្នះ ៨ និងស្មើ ១ តាមពីក្រោយដោយ AC Milan មាន ២៥ពិន្ទុដូចគ្នា ក្រោយឈ្នះ Bologna ប៉ុន្តែចាញ់ផលសងគ្រាប់បាល់ ខណៈ AS Roma ឈរលេខ ៤ មាន១៦ពិន្ទុក្នុងដៃ។

ងាកមកការប្រកួតធំមួយគូទៀត Inter Milan បានត្រឹមស្មើ Juventus ប៉ុណ្ណោះសម្រាប់ការប្រកួតនៅទឹកដី San Siro។ ម្ចាស់ផ្ទះ Inter រកបានមួយគ្រាប់មុនដោយ Edin Dzeko តាំងពីនាទីទី១៧ ខណៈ Juventus បាន ១ពិន្ទុវិញពីគ្រាប់ចុងម៉ោងរបស់ Dybala ដោយបាល់ពិន័យ ១១ម៉ែត្រនាទី ៨៩។ ១ពិន្ទុនេះ Inter នៅបន្តឈរក្នុងចំណាត់ថ្នាក់ Top4 ដដែល ខណៈ Juventus រំកិលឡើងមកដល់ចំណាត់ថ្នាក់លេខ ៦ មាន ១៥ពិន្ទុស្មើជាមួយ Lazio និង Fiorentina៕